हडपसर परिसरातील प्रतिभावान स्केटिंगपटू मनस्वी पिंपरे हिने राज्य आणि राष्ट्रीय स्तरावर आपल्या कामगिरीची चमक दाखवली आहे. लहान वयातच तिने जिद्द, मेहनत आणि सातत्याच्या बळावर यशाची नवी उंची गाठली आहे. तिच्या या यशामागे असलेला संघर्ष आणि चिकाटी ओळखून, एकनाथ शिंदे फाऊंडेशन चे संस्थापक अध्यक्ष व शिवसेना शहरप्रमुख प्रमोद नाना भानगिरे यांच्या हस्ते मनस्वीला ₹५१,०००/- ची आर्थिक मदत देण्यात आली.

या प्रसंगी बोलताना प्रमोद नाना भानगिरे म्हणाले, “हडपसरमध्ये अनेक खेळाडू आहेत ज्यांच्याकडे प्रतिभा आहे पण संसाधनांचा अभाव आहे. अशा तरुणांना योग्य दिशा आणि मदत मिळाली, तर ते राज्याचं आणि देशाचं नाव नक्कीच उज्ज्वल करतील. मनस्वीसारख्या मेहनती मुली आमच्यासाठी अभिमानाचा विषय आहेत. एकनाथ शिंदे फाऊंडेशन सदैव त्यांच्या पाठीशी उभं राहील.”

एकनाथ शिंदे फाऊंडेशन नेहमीच समाजातील वंचित, गरजू आणि उपेक्षित घटकांसोबतच शिक्षण, आरोग्य, आणि क्रीडा क्षेत्रातील प्रतिभावान तरुणांना प्रोत्साहन देत असते. फाउंडेशनच्या या उपक्रमामुळे हडपसर आणि पुणे परिसरात नव्या पिढीला प्रेरणा मिळत आहे.

मनस्वी पिंपरेसारख्या खेळाडूंना दिलेली ही मदत केवळ आर्थिक नाही, तर ती नव्या स्वप्नांना पंख देणारी सामाजिक गुंतवणूक आहे. एकनाथ शिंदे फाऊंडेशनच्या माध्यमातून सुरू असलेला “क्रीडेला प्रोत्साहन, तरुणांना बळ” हा उपक्रम भविष्यातही अनेक खेळाडूंच्या जीवनात सकारात्मक बदल घडवेल, असा विश्वास व्यक्त करण्यात आला.